المشروبــــــــــــــات ...... ملف رمضانى

[رونيا]

طبعا ده بقى اللى حيبقى مختص بالعصاير
وبما ان رمضان جى فى صيف
فلازم نكتر العصاير
ونقلل الاكل خصوصا للازواج والاولاد
اللى بيخرجوا لفترات طويله وقت الصيام
ربنا يعين عباده
1 عصير عجيب
اخويا فى الله قالى على طريقه عصير
وانا بما ان كل شىء متوفر ليها
جربتها
بجد طلعت تجنن قلت لازم اقولها لكم
عايزين سفن اب ازازاه من اى نوع
لتر او اتنين على حسب
وتحطيها فى دورق ازاز عشان الشكل يعنى
هههههههه اهم حاجه الشكل
وعليها حتته تفاح انا عشان الشكل
قطعت التفاح جوليان ( يعنى جوانج )
وعليهم نعناع اخضر
وقلبى
وبالف هنا

لا يكمل المل الرمضانى الا بالياميش
عايزين الاتى
مشمش\ قراصيا \ تمر
كل ده منقوع من قبلها بيوم
تضربيهم فى الخلاط مع نص كوبايه لبن
ونص كوبايه عصير تفاح
( فى الوصفه الاصليه بتحط معاهم معلقه ميه ورد بس انا مش بحبها وبعمله من غيرها )
انتى لو تحبيها او معتاده عليها حطيها
ويكون سايل كثيف
عايزه تقللى كثافته نزود ميه تمر ( من اللى اتنقع فيها التمر )
وطبعا يحلى
وقبل التقديم ندهن الكوب بالزبادى ونحط عليه العصير
بحيث يعطى شكل جمالى

طريقه تانيه
ان تنقعى تمر مع قراصيا مع مشمش مع تين
مع مكسرات وزبيب الموجود عنديك بمعنى اصح
وتسبيهم يوم كام
وتانى يوم يتحلى وقبل التقديم يتضاف شويه جوز هند


عصيـــــــــــــر الزبــــــــــادى
خفيف ولذيذ وفايده مضاعفه
لكل كوب زبادى كوب لبن
ويتضرب فى الخلاط اللبن مع الزبادى مع السكر
ويقدم فى الحال

عصـــــــــــــــــائر الفواكهه
عصيــــــــر الشهد
او الشمام
محتاجين واحده شهد ( شمام متوسطه )
تتقشر وتتقطع وتتحط فى الخلاط
مع السكر ويضرب
وعلى طول تقديمه

الموز باللبن
نضرب فى الخلاط موز ولبن
( افضل اللبن يكون صافى لاعلى فايده )
وسكر
ويتشرب فى الحال عشان ميسودش

الفراوله باللبن
نفس الطريقه بتاعه الموز

الموز والفراوله باللبن
نحط مقدار متساوى من الموز واللبن مع بعض
واد بعض فى الخلاط وعليهم اللبن والسكر
ويضربوا
ويشرب حالا

عصيـــــــــــــــر المانجو
محتاجين مانجه ( الرخيصه عشان انا حنحليها )
وتتقسر وتتقطع وتتحط فى الخلاط
وتتحلى وبالف هنا

الفراوله
تتضرب الفراوله فى الخلاط مع ماء فقط وسكر
تجمل بقطع من الفراوله وبالف هنا

الجوافه باللبن \ ساده
تقشرى الجوافه وتحطيها فى الخلاط
مع ميه وسكر وتتضرب
لو عايزاها باللبن يبقى يضاف لبن
وبالف هنا

قمــــــــــــــــــر الديـــــــــــــــــــن
طبعا يا رمضان
قمر الدين
بتنقعيه من بالليل فى ميه
وتسبيه فى اخر رف فى التلاجه
ولما يفك خالص
يضرب فى الخلاط بميته
ويتحلى وطبعا التقل بتتحكمى انتى فيه

الكركـــــــــــــــــــــــديه
محتاجين كوبايه ورق كركديه
وعليهم كوبيتين ميه ويترفعوا على النار
ويتسابوا او ما يغلو تخففى النار
وتسبيه شويه لحد ما يغلى حبتين
وبعدين تحطيه فى التلاجه
لتانى يوم
تانى يوم املى الخلاط ميه وكوب سكر
واضربيه وصفى الكركديه من الورق
وضيفى الميه بالسكر
ان كان محتاج زياده سكر
تاخدى منه كوب وتضربيه مع سكر
وبالف هنا

العصـــــــــــــــــير الموف
كوبايه الا ربع كركديه
والربع يبقى لبن
اه والله وبقى موف
هههههه

التمــــــــــــــر هندى
محتاجين ميه مغليه حوالى لتر
وبعد ما تغلى يتحط التمر هندى حوالى نص كوبايه
وبعد ين نوطى النار ونسيبها 5 دقايق
وبعدين تتشال وتتحط فى التلاجه لتانى يوم
وبعدين نحليهم بكوبيتين ميه فى الخلاط عليهم
السكر
ويتضاف للتمر بعد ما نكون صفيناه
وبالف هنا

معلش نكمل فى اقرب وقت
تعبت
ويا ريت تحاولوا تجربوا عشان اللى مش بيتقبلوا
اولا ديك او زوجيك او اخواتيك تستبعديه من دلوقتى

[الرميساء]

بجد نفسى رمضان يكون بكرة

من اللىكتباه مش ممكن نفسى اعمل دلوقتى كل العصاير دى

الله يهديكى بدخل قسم المطبخ على مواضيعك بقوم جعانه واجرى ادخل على المطبخ

اجرب كل اللى كتباه من وصفات واكلات بجد انتى روعة وممتازة ماشاء الله عليكى

انا مش بحسده انا فرحانه اوى بيكى ربنا يحرصك من كل شر

[رونيا]

ربنا يكرميك يا رميساء بجد والله انا اللى فرحانه
وبحمد ربنا والله انى فى وسط حياتى عرفت اخت فى الله زيك
ربنا يحميكى ويباركليك ويكرميك من فضله دنيا واخره
ويحميلك ولاديك ويهديهم ليكى وييسرليك احواليك كلها
والله كلاميك يا رميساء بجد معندكيش فكره بيعمل فيا ايه
ربنا يكرميك ويحفظيك يا اختى
والله انى احبيك فى الله
بارك الله فيكى

[رونيا]

اللمون
عندى طريقه امى لليموناده تخليها
فتره كبيره عنديك ومن غير طعمها ما يتغير

الطريقه دى بتاعه الوالده الله يباركلى فى عمرها
وواخدها عن جدتى الله يرحمها
هى غريبه اوى بس بتخلى عصير اللمون ميمررش
وفى نفس الوقت يفضل يعنى ممكن نحتفظ بيه فوق ال3ايام
وطعمه حلو اوى ينفع للاطفال اللى عندهم برد

نبداء بالطريقه محتاجين

كوب سكر
كوب ماء
كوب ونص عصير لمون صافى( يقطع اللمون ونعصره بالعصاره اليدويه)
واخيرا بشر لمونيتن تلاته

الطريقه ومتستغربوش

نحط السكر والميه على النار ونقلب لحد ما يدوب السكر خالص
بعد ما يدوب السكر خالص يتشال من على النار ويضاف ليه
اللمون
وبعدين تخلطيهم بمعلقه وتحطى المزيج فى الخلاط مع بشر اللمون
واضربى
لون العصير طبعا حيتغير

بعدين نحط المزيج فى شفشق كبير اكبر من حجم المزيج
ونضيف عليه 4 او خمس كوبيات ميه
وبعدين نحطه فى التلاجه
وللعم والله بجد طريقه جميله واللمون مش بيمرر ابدا والطعم
اجمل من اى محل جربوا فى نص الكميه وشوفوا عامل ازاى

نكمل العصاير ان شاء الله
الميلك شيك بانواعه
محتاجين لبن صافى لكل كوب لبن
كوب ايس كريم
( وهنا تتحكمى فى الطعم لو عايزاه فانيليا بيكون الايس كريم فانيليا مانجه يكون مانجه الخ )
ويتضربوا مع بعض مع شويه سكر
والسر عشان يطلع بنفس طعم المحلات ده
ربع كبايه عصير من نوع اللى استعملتيه
مثلا انتى استعملتى شيكولاته
يبقى تجيبى ربع كوبايه كاكاو سابق تحضيرها وتحليتها
وتزودى الكاكاو ويتضاف بارد للميلك شيط
لو فراوله يبقى عصير فراوله
لو مانجه يبقى مانجه
ويقدم على طول ميستناش

عصيــــــــــــــر الدوم
حتلاقى دوم عند العطار مطحون اما نص طحنه
او مطحون ناعم
محتاجين اللى مطحون نص طحنه عشان الطعم
وتحطيه يتنقع فى ميه من قبلها بيوم
كميه كويسه
وتحطى لبن خالص وعليه الدوم المنقوع فى خلاط العصير
مع السكر
ويضرب ويصفى ويشرب بالعافيه عليكم

عصيـــــــــــــر السودانى
ده بقى يعنى يوم العيد عند محمد لما اعمله
وده حلو فى رمضان لان بيبقى فيه سودانى
محتاجين سودانى مقشر وغير مملح
اللى بيتباع وسط ياميش رمضان
وتحطيه فى الخلاط كميه مناسبه
قولى تمن الخلاط كده
والباقى لبن وتضربيه كويس
اكتر من مره وتحليه
وميتصفاش يتشرب كده


عصــــــــــير البطيخ
اه بطيخ كمان
البطيخ اللى وشك انه خلاص طرى وممكن يبوز
اختكم لازم تستغله حرام نرمى نعمه ربنا
بتشيلى البذر وتحطيه فى الخلاط
كميه كويسه ومعاه كوبايه ميه ( بنسبه 3:1 ال3 بطيخ وال1 ميه )
وسكر وتضربيهم
طبعا هم بيضاعف الكميه لان البطيخ كله ميه
وجديد وخفيف ومرمنيناش حاجه

العرق سوس
عشانيك يا سميه

محتاجين كوبايه من العرق سوس
تحطيها فى اناء وعليها نص معلقه كربونات
وعليها كوبتين ميه
وقلبيه وبعدين حطيه فى قطعه قماش
ويتعمل صره وبعدين تحطى حله كبيره فيها
8 كوبيات ميه وفيها السره
وكل شويه تعصرى السره
بيكون جاهز للتقديم بعد 6 ساعات بس

لمحبيــــــــــــــــين القهوه
القهوه البارده
للى زى حلاتى وبيموتوا فى القهوه
محتاجين نص كبايه ميه ساقعه وعليها معلقتين نسكافيه
وتوضع فى الفريزر حتى تتجمد
تتطلعيها وتحطيها فى خلاط العصير
وعليها كوبيتين لبن
وسكر حسب الرغبه
وشويه كاكاو حلو حوالى معلقتين
واضربيهم وبالف هنا

الموكا
كوبايه ايس كريم شيكولاته ( او موكا )
وعليهم كوب لبن ومعلقتين نسكافيه وسكر
ويضربوا فى الخلاط
ووقت التقديم تتصب وعليها رشه نسكافيه من فوق

التانــــــــــــــج ومشتقاته
لو اضفتيه لعصير الفراوله بيبقى جميل جدا
ومنعش ولو برده اضفناه لعصير الفروله بالموز باللبن
بيبقى العصير جميل جدا
والاضافه بتكون ربع كوبايه بس

ونكمل فى اقرب وقت
لو الموضوع مش مترتب سامحونى النت بيقطع

[الرميساء]

ماشاء الله

جزاكى الله خيراا حبيبتى الغاليه

ومش عارفه اقولك ايه على الكلام الحلو وده وكل

اللى اقوله ان ربنا يحفظك من كل شر

واشهد الله انى احبك فى الله

[مستغفرة]

ماشاء الله

مشروبات رائعه

ومجهود ممتاز

جزاكى الله خيرا وبارك الله فيكى

[رونيا]

ربنا يكرميك يا رميساء ويجزيكى كل خير
كلماتيك اسعدتنى اسعد الله اياميك بكل الخير

مستغفره بارك الله فيكى شرفتينى يا اختى

[حفيدة عائشة]

http://akhawat.islamway.com/forum/uploads/post-20628-1188455062.gif
http://abeermahmoud07.jeeran.com/664-Important-AbeerMahmoud.gif